2Ki 2 | PMA | STEP | En avong tai, provet Ilaetsa ka Elisa lulokovein taon ten out Kilkal ka lumul lumusil sise luva.

2 Kings 2

Ahi Kulat Provet Ilaetsa Va en Out Nesa ka Elisa Kur Vulin

2 King 2:1,7-15

1 En avong tai, provet Ilaetsa ka Elisa lulokovein taon ten out Kilkal ka lumul lumusil sise luva.

7 Navong lumul lumual luva, provet sav keil koa avi hanumau elu ka halualim emun (50) amusil keilu uva en Oaisal Sodan. En out enek, Ilaetsa keilu Elisa lumulomal vesesal en oaisal enek, ka provet sav keil amulomal soutin neli ran keilu. 8 Evus, Ilaetsa kulat kot omon, lum kati, ka muas oaisal eni. Navong muasi mukok, oai maseh elu. Sakini, keilu lumu koteh oai en tanmes, luva en usite. 9 Navong lurokol usi oaisal, Ilaetsa viteni min Elisa vit, “Hervitei tuetin, Ahi hekulat nau nilokoveinuk. Sakini helamu, hetahos keik kihiten asa emvati moumoni minuk.”

Elisa vit kesi mini vit, “Ekvati kovasan tei keihoen onom minau helin provet sav keil keke nikesuk nikur vulum.”

10 Ka Ilaetsa viteni mini vit, “Asa komul kovis inau eni vi tounah koa keih keke masani. Ka munak Ahi hemaenuk kiles sise koa hekulat nau nilokoveinuk eni, keik kikur asa koa kovisi. Ka munak kirlestei nau navong nilokoveinuk, keik kirkurtei.”

11 Ka navong keilu lumul luselus ka lumual luva, hatte tas, ahang tai ka nesa suval kat koa hos lehei. Muloh luhu en keilu ka kat koanek kur Ilaetsa va en out nesa en eang tai koa karali. 12 Navong Elisa lesi, kei vis keih va min Ilaetsa vit, “!Ilaetsa, tata onak eli! !O tata onak eli! Keik koa kolei kokoe en komai, me-Isrel keil, ral keihoen onom koa mulin hos ka kat keil tavaeen, kosa koloh kovien komai.” Ka navong Elisa rolestei mun, rangisi ka rali vas eisin omon.

13 Evus, les kot omon Ilaetsa koa mot rani. Kuri ka va ris mulomal en usi Oaisal Sodan. 14 Sakini, vuli kat kot enek ka viteni vit, “?!Iahova, Ahi onen Ilaetsa, koro venau vuo!?” Evus, muas oaisal en kot enek, ka oai maseh va en usite keilu. Sakini, Elisa mual kotehei va ris en usite.

15 Vangi provet keil koa aka en out Seriko amul amulomal soutin neli. Ka navong keil alesi, avit, “!Alles tei mau! !Keihoen onen provet Ilaetsa mai sien Elisa!”